२३ मंसिर,काठमाडौं। नेपाल प्रिमियर लिग (एनपीएल) मा जनकपुर बोल्ट्ससँग लुम्बिनी लायन्स पराजित भएको छ। लुम्बिनी जनकपुरविरूद्धको खेलमा १ रनले पराजित भएको हो।
काठमाडौंको कीर्तिपुरस्थित त्रिवि क्रिकेट मैदानमा आज सम्पन्न खेलमा जनकपुरले दिएको १ सय ३७ रनको लक्ष्य पछ्याएको लुम्बिनीले ८ विकेटको क्षतिमा १३५ रन मात्र बनाउन सक्यो । योसँगै लुम्बिनीले एनपीएल लगातार चौथो हार व्यहोरेको छ।
लुम्बिनीका लागि कप्तान रोहित पौडेलले सर्वाधिक ३५ रन बनाए। त्यसैगरि टोम मुरेको नाममा ३१ रन रह्यो । उता अर्जुन साउदले २० र सन्दीप जोराले १६ रन बनाए ।
जनकपुरका लागि हर्ष ठाकेर एक्लैले ५ विकेट लिए। किशोर महतो, ललित राजवंशी र शेर मल्लले १-१ विकेट लिए। खेलमा टस हारेर पहिले ब्याटिङ गरेको जनकपुरले ९ विकेटको क्षतिमा १३६ रन बनायो ।
कप्तान अनिल साहले ४५ तथा लहिररु मिलान्थाले २४ रन बनाए । अभिशेष गौतमले ३ तथा साद बिन जाफर र रोहित पौडेलले २–२ विकेट लिए । लुम्बिनीको यो चौथो खेलमा अंकविहीन छ भने जनकपुर चारै खेल जितेर आठ अङ्क बनाएको छ ।
