४ पुस, काठमाडौं। मलेसियामा जारी एसीसी यू-१९ महिला एसिया कप क्रिकेटमा आज देखि सुपर फोर चरणका खेलहरु सुरु हुनेछन्।
नेपाल र श्रीलंकाबीचको खेल बिहान ११ः४५ देखि सुरु हुनेछ । प्रतियोगिताको समूह चरणको पहिलो खेलमा नेपालले पाकिस्तानविरुद्ध ६ विकेटको सानदार जित निकालेको थियो । नेपाल र भारतबीचको खेल भने वर्षाका कारण रद्द भयो ।
मंगलबार बायोमास क्रिकेट मैदानमा नेपालले प्रस्तुत गरेको ९५ रनको लक्ष्य पछ्याइरहेको भारतले ३.१ ओभरमा विकेट नगुमाइ २८ रन बनाएको अवस्थामा पानी परेपछि खेल रोकिएको थियो । खेल रोकिएपछि भारत र नेपालले एक/एक अंक बाँडे ।
यो नतिजासँगै समूह ‘बी’ मा समान ३ अंक रहे पनि नेट रन रेटका भारत विजेता र नेपाल उपविजेता बन्दै सुपर चारमा पुगेका हुन् । फाइनल खेल आगामी आइतवार रहेको छ । एसियाबाट यु १९ महिला विश्व कपमा छनोट भएकाले नेपालले एसिया कपमा मौका पाएको हो ।
यु १९ महिला विश्व कप आगामी बर्षको जनवरीमा मलेसियामा नै आयोजना हुँदैछ । विश्व कपमा नेपाल अस्ट्रेलिया, बंगलादेश र स्कटल्यान्डसँग समूह ‘डी’ मा रहेको छ ।
