काठमाडौँ। कम्प्युटर एसोसिएसन नेपाल महासंघ (क्यान)को पहिलो महिला अध्यक्षका रूपमा सुनैना घिमिरे पाण्डे निर्विरोध निर्वाचित भएकी छन् ।
महासंघको ३१ औं वार्षिक साधारणसभा तथा १५ औं महाधिवेशनका बेला हुन लागेको निर्वाचनमा अध्यक्ष पदमा पाण्डेको मात्र उम्मेदवारी परेपछि उनी निर्विरोध चयन भएकी हुन् ।
महासचिव अधिकारीका अनुसार क्यान महासंघको ३१औं वार्षिक साधारणसभा तथा १५औं महाधिवेशनबाट संस्थाले पहिलो महिला अध्यक्षको रुपमा सुनैना घिमिरे पाण्डेलाई पाउने भएको हो। पुस १३ गते शनिबार क्यान महासंघको १५औं महाधिवेशन हुँदैछ । पाण्डेले यसअघि क्यान महासंघको विभिन्न भूमिकामा रहेर काम गरेकी छिन् ।
निर्वाचन प्रक्रियाअन्तर्गत पुस १३ गते औपचारिक घोषणा हुनेछ । सदस्य र अन्य पदका लागि शनिबार निर्वाचन हुँदै छ । क्यानको नेतृत्व हाल रञ्जित कुमार पोदारले गरिरहेका छन् ।
पाण्डेले पनि यसअघि क्यान महासंघको उपाध्यक्षको जिम्मेवारी सम्हालिसकेकी छिन् । २०७६ सालमा अध्यक्ष पदका लागि प्रतिस्पर्धा गरेकोमा उनी नवराज कुँवरसँग पराजित भएकी थिइन् । उनी सफ्टवेयर डेभेलप्मेन्ट कम्पनी जेनेरल टेक्नोलोजीकी प्रबन्ध निर्देशक हुन् ।
