१८ पुस, काठमाडौं। नेकपा (माओवादी केन्द्र) को स्थायी कमिटी बैठक सुरु भएको छ । केन्द्रीय समिति बैठकको एजेण्डा तय गर्न माओवादी स्थायी कमिटी बैठक बोलाइएको हो । बैठक ३ दिनसम्म चल्ने छ ।
पुस २१ र २२ गते बस्ने केन्द्रीय समितिका एजेण्डा तय गर्न बैठक बसेको हो । बैठकमा पूर्व उपराष्ट्रपति नन्दबहादुर पुन र पूर्वउपाध्यक्ष कृष्णबहादुर महरा पनि सहभागी भएका छन् । पुन राजनीतिमा सक्रिय हुने उद्देश्यसहित माओवादी बैठकमा सहभागी हुन थालेका हुन् । बैठकले आगामी केन्द्रीय कमिटी बैठकको एजेण्डा तय गर्ने प्रवक्ता अग्निप्रसाद सापकोटाले बताए । बैठक शनिबारसम्म चल्नेछ ।
बैठकमा पार्टीको पछिल्ला समामयिक राजनीतिक घटनाक्रम, आगामी कार्ययोजना, प्रतिपक्षमा रहेको पार्टीको भूमिकालगायतको विषयमा छलफल हुनेछ । आफू नेतृत्वको सरकार ढलेर प्रतिपक्षमा पुगेको पाँच महिनापछि प्रचण्डले सिंगो केन्द्रीय कमिटीको बैठक फेस गर्दैछन् ।
केन्द्रीय कमिटीको बैठकअघि प्रचण्डले सबै प्रदेशस्तरीय परामर्श बैठक गरेका थिए । आगामी महाधिवेशनबाट केन्द्रीय कमिटी, पदाधिकारीसहित अन्य कमिटी पनि विधान अनुसार सानो बनाउन ुपर्नेमा नेताहरूको जोड छ ।
