६ माघ, काठमाडौं। पूर्वप्रहरी नायब महानिरीक्षक (डीआईजी) छविलाल जोशी काठमाडौं जिल्ला अदालतमा उपस्थित भएका छन् ।
कालीमाटीस्थित स्वर्णलक्ष्मी सहकारी ठगी प्रकरणका अभियुक्त जोशी आइतबार अदालतमा उपस्थित भएका जिल्ला प्रहरी परिसर काठमाडौंका एसपी नवराज अधिकारीले जानकारी दिए ।
जोशीको बयान तथा थुनछेक बहस काठमाडौं जिल्ला अदालतका न्यायाधीश ठाकुरप्रसाद खरेलको इजलासमा हुनेछ । बयान तथा थुनछेकपछि जोशीलाई पुर्पक्षका लागि थुनामा पठाउने कि धरौटीमा छाड्ने भन्ने आदेश आउनेछ । जोशी गोर्खा मिडियाका पूर्व प्रवन्ध निर्देशक हुन् ।
स्वर्णलक्ष्मिी सहकारी को रकम अपचलन गरेको आरोपमा उनीविरुद्ध काठमाडौँ जिल्ला अदालतमा मुद्दा दायर भएको थियो । सो प्रकरणमा रास्वपाका सभापति तथा पूर्व गृहमन्त्री रवि लामिछाने गत साता नै अदालतमा हाजिर भएका थिए ।
कास्की जिल्ला अदालतले सूर्यदर्शन सहकारीमा जोशीलाई ८८ लाख र लामिछानेलाई ६५ लाख धरौटीमा रिहा गर्न आदेश दिएको थियो।न्यायाधीश ठाकुरप्रसाद खरेलको इजलासमा उनको बयान गराइँदैछ। वयान सकिनासाथ थुनछेक वहस सुरु हुनेछ।
