९ माघ, एजेन्सी । टर्कीको एक होटलमा भएको आगलागीमा परी ज्यान गुमाउनेको संख्या ७६ पुगेको छ । आगलागीमा ५० बढी घाइते भएका छन् ।

टर्कीका स्वास्थ्यमन्त्री कमल मेमिसोग्लुले आगलागीमा ५१ जना घाइते भएका बताएका छन्। यीमध्ये एक जना आइसीयू मा छन्। यसबाहेक, १७ जनालाई अस्पतालबाट डिस्चार्ज गरिएको छ।

यो आगो नियन्त्रणमा लिन १२ घण्टा लागेको थियो। टर्कीका कानूनमन्त्रीले यस घटनामा ९ जनालाई पक्राउ गरिएको बताएका छन्। पक्राउ पर्नेहरूमा रिसोर्टका मालिक पनि छन्।

बोलुको १२ तले ग्रान्ड कार्टल होटलमा मंगलबार स्थानीय समय अनुसार बिहान ३:२७ बजे आगलागी भएको थियो। होटलमा २३४ जना बसिरहेका थिए। बोलु टर्कीको राजधानी अंकाराबाट १७० किलोमिटर उत्तरपश्चिममा अवस्थित छ।