१७ माघ, काठमाडौँ। पूर्वसांसद प्रमोद साहले जनता समाजवादी पार्टी (जसपा) छाडेका छन् । पार्टी अध्यक्ष उपेन्द्र यादवको कार्यशैलीमा प्रश्न उठाउँदै साहले राजीनामा दिएका हुन् ।
उनले आफूले सचिव पदमा उमेदवारी दिइसकेपछि अध्यक्ष यादवले चुनाव रोकेर मनोमानी नियुक्ति गरेको र पार्टीलाई एकाधिकारमा चलाइरहेको आरोप लगाएका छन् ।
गएको असारमा प्रदेश राजधानी जनकपुरधाममा सम्पन्न पार्टीको महाधिवेशनमा पार्टीको सचिव पदमा उम्मेदवारी दिने तयारी गरेका साहले पार्टीका केन्द्रीय अध्यक्ष उपेन्द्र यादवले निर्वाचन नै नगराई आफूखुसी पदाधिकारी नियुक्त गरेको र आफूले जिम्मेवारी नपाएको भन्दै असन्तुष्टि पोखेका छन् ।
साहले २७ वर्षको मधेश केन्द्रीत राजनीतियात्रापछि राजीनामा दिएको बताएका छन् । सर्लाहीमा जसपा नेपालका नेताले एकपछि अर्को गर्दै राजीनामा दिइरहेका छन् । केही दिनअघि मात्रै जिल्ला अध्यक्ष वीरेन्द्र यादवसहित दर्जनौं नेता,कार्यकर्ताले सामूहिकरुपमा पार्टी परित्याग गरेको घोषणा गरेका थिए।
