१८ माघ, काठमाडौं। नेपाली कांग्रेसका सभापति शेरबहादुर देउवाले नेकपा एमालेसँग गत असार १७ गते भएको सात बुँदे सहमतिमा आफ्नो पार्टी दृढ रहेको बताएका छन् ।
कांग्रेस-एमाले सरकारले राजनीतिक स्थिरता दिएको समेत उनले दाबी गरे । शुक्रबार प्रतिनिधिसभा बैठकमा मन्तव्य राख्दै देउवाले ७ बुँदे सहमतिअनुसार संविधान संशोधन गर्नुपर्ने बताएका हुन् ।
‘कांग्रेस-एमालेबीच ७ बुँदे सहमति भएर सरकार गठन भएको हो । ७ बुँदे कार्यान्वयनमा नेपाली कांग्रेस दृढ छ,’ देउवाले भने । प्रधानमन्त्री केपी शर्मा ओलीपछि संसद्मा बोलेका देउवाले सरकारले राम्रो काम गरिरहेको र भविष्यमा अझ राम्रो काम गर्ने विश्वास लिएको बताए ।
उनले कुनै पनि सरकारको समग्र ६ महिनाको समय पर्याप्त नभएको उल्लेख गर्दै आगामी दिनमा असल परिणाम देखिने अनुभूति गरेको बताए ।
