२४ माघ,जनकपुरधाम। मधेश प्रदेशका मुख्यमन्त्री सतिशकुमार सिंह मध्यराति कमला खोलाको अनुगमनमा पुगेका छन्।
मुख्यमन्त्री सिंहसहित पुगेका सुरक्षाकर्मीलाई देखेपछि रातको समयमा कमला खोलाको दोहन गरिरहेकाहरू भागाभाग भए । धनुषाको गणेशमान चारनाथ नगरपालिका–७ स्थित कमला खोलाको पोर्ताहा क्षेत्रमा बुधबार मध्यरातमा पनि बालुवा र गिट्टी उत्खनन् भइरहेको थियो ।
मुख्यमन्त्री सिंहसँगै धनुषा प्रहरीका प्रवक्ता एवम् प्रहरी नायब उपरीक्षक बरुण सिंह पनि थिए । उनको टोलीले नदीजन्य पदार्थ ओसारपसारमा संलग्न १३ ट्याक्टर, दुईवटा बकेट र पाँच जना चालकलाई नियन्त्रणमा लिइएको छ ।
रातको समयमा पनि कमला खोलाको वनक्षेत्र र सामुदायिक वन क्षेत्रमा अवैध तथा अनुचितढंगले ढुंगाा–गिट्टी र बालुवा उत्खनन भइरहेको गुनासो आएपछि मुख्यमन्त्री सिंह धनुषाका सुरक्षा अधिकारीसहित बुधबार राति १२ बजेदेखि ३ बजेसम्म त्यस क्षेत्रमा खटिएका हुन् ।
मुख्यमन्त्री सिँहले विधि, प्रक्रिया र मापदण्डविपरीत प्राकृतिक स्रोतको उत्खनन् तथा जथाभाबी दोहनबाट राज्यको सम्पत्ति हानीनोक्सानी भएको तथा विपत् निम्तिँदै आएकाले त्यसविरुद्ध आफूले अनुगमन गरेको बताए ।
