१२ फागुन, काठमाडौं। नेकपा (एकीकृत समाजवादी) को केन्द्रीय कमिटीको दोस्रो पूर्ण बैठकले सरकार नालायक र दमनकारी बनेको निश्कर्ष निकालेको छ ।
गत फागुन ९ र १० गते नेपाल प्रशासनिक प्रशिक्षण प्रतिष्ठान, ललितपुरमा बसेको एकीकृत समाजवादीको बैठकले सरकार नालायक र दमनकारी बन्दै जाँदा सडकले पनि सही बाटो नभेटाएर अराजक र पपुलिष्टको कब्जामा गएको निश्कर्ष निकालेको हो ।
उनले सहकारी ठगी, मिटरबाजी, अनलाइन ठगीले गर्दा गरिब जनताको जीवन कष्टकर हुँदै गएको र लाखौँ जनताले सहकारी राखेको बचत डुबेको बताए । त्यस्ता भ्रष्ट तथा ठगहरूलाई नियन्त्रणमा लिई अविलम्ब कडा भन्दा कडा कारबाही गर्न र सम्बन्धित पक्षको पैसा फिर्ता गराउन सरकारसँग माग गर्ने निर्णय केन्द्रीय कमिटीले गरेको बताए ।
बैठकमा राजनीतिक प्रतिवेदन, पार्टीको नियमावली, विनियमहरू, विभिन्न निर्देशिकाहरू, महाधिवेशनको सामान्य समीक्षा, पार्टीको तात्कालिक कार्ययोजना र पार्टीका तात्कालिक संगठनात्मक तथा विभिन्न राजनीतिक विषयमा छलफल गरेको छ । छलफलमा १७६ केन्द्रीय सदस्यले भाग लिएका थिए। केहीले लिखित सुझाव पेश गरेको महासचिव घनश्याम भुसालले बताए।
केन्द्रीय सदस्यहरूबाट प्राप्त सुझावहरूलाई समेटी तात्कालिक कार्ययोजना र अन्य दस्तावेजहरु सम्पादन गर्न र केन्द्रीय कमिटी बैठकमा उठेका सङ्गठनलगायत विषयहरूमा निर्णय गर्न केन्द्रीय सचिवालयलाई जिम्मेवारी दिएको पनि भूसालले जानकारी दिए। केन्द्रीय कमिटी बैठकले समसामयिक विषयमा पार्टीको धारणाका रुपमा २० वुँदे प्रस्ताव पनि पारित गरेको छ।
