महोत्तरी। इस्लाम धर्मावलम्बीहरूले मिथिला माध्यमिकी परिक्रमाका यात्रीहरूलाई आज ध्रुवकुण्डमा स्वागत गरेका छन्।
परिक्रमा यात्राको सातौँ दिनको रात्रि विश्रामस्थल ध्रुवकुण्ड हो, जुन इस्लाम धर्मावलम्बीको बाहुल्य क्षेत्र मानिन्छ। बलवा नगरपालिकाका रौजा, धमौरा, र अधियानपुरका इस्लाम धर्मावलम्बीहरूले यात्रीहरूलाई खादा र माला लगाइ सम्मान गरेका हुन्।
ध्रुवकुण्ड हिन्दू धर्मावलम्बीहरूको आस्थाको केन्द्र हो, जहाँ सत्ययुगका राजकुमार ध्रुवले कठोर तपस्या गरेका विश्वास गरिन्छ। सोही ठाउँमा इस्लाम परम्पराका सुफी सन्त गदालीबाबा, बहार अलीबाबा, र रहमत अलीबाबाका मजारहरू पनि रहेका छन्।
स्थानीय सामाजिक कार्यकर्ता मन्सुल कवारीका अनुसार हिन्दू र मुस्लिम समुदायले परस्परको धार्मिकस्थललाई सम्मान गर्ने परम्परा रहँदै आएको छ। परिक्रमा यात्रुहरू भोलि महोत्तरीको अन्तिम विश्रामस्थल कञ्चनवनतर्फ प्रस्थान गर्नेछन्।
