काठमाडौँ। नेपाल कम्युनिष्ट पार्टी (एकीकृत समाजवादी) ले सुशासन, रोजगारी, शिक्षा, स्वास्थ्य, पर्यटन तथा पूर्वाधार विकासलगायतका विषयलाई केन्द्रित गर्दै देशव्यापी समाजवादी अभियान सुरु गरेको छ।
केन्द्रीय प्रचार विभाग प्रमुख प्रकाश ज्वालाका अनुसार वैशाख २२ गतेसम्म सञ्चालन हुने यस अभियानका क्रममा विभिन्न क्षेत्रका सङ्घ, सङ्गठन तथा व्यक्तिहरूसँग वडा, गाउँ, प्रदेश र केन्द्रस्तरमा छलफल गरिनेछ।
अभियानअन्तर्गत सम्बन्धित क्षेत्रका विज्ञहरूसँग परामर्श गरी आवश्यक सुझाव सङ्कलन गरिनेछ। जनताका विकासका आकांक्षा पूरा नभएको अवस्थामा उनीहरूको असन्तुष्टि सम्बोधन गर्न तथा देशको वर्तमान परिस्थितिबारे जानकारी गराउन यो अभियान प्रभावकारी हुने विश्वास ज्वालाले व्यक्त गरेका छन्।
