नेपालगञ्ज । स्वास्थ्य तथा जनसङ्ख्या मन्त्री प्रदीप पौडेलले पूर्वविशिष्ट व्यक्तिहरूलाई सम्मान उचित भए पनि थप आर्थिक सुविधा दिन नहुने बताएका छन्।
बाँकेमा आयोजित कार्यक्रममा उनले राज्यका स्रोतसाधनलाई प्रभावकारी रूपमा परिचालन गर्नुपर्ने भन्दै पूर्वविशिष्टहरूलाई अनावश्यक सुविधा प्रदान गर्नु गलत हुने धारणा व्यक्त गरे।
उनले सरकारी, निजी तथा सामुदायिक अस्पतालहरूमा श्रम ऐनअनुसार तलब वितरण नगरेमा ती संस्थाहरूको सम्बन्धन खारेज गरिने चेतावनी दिए।
मन्त्री पौडेलले स्थानीय तहमा आधारभूत अस्पताल निर्माणका लागि सरकारले ठूलो लगानी गरिसकेको उल्लेख गर्दै ती अस्पतालहरूलाई पूर्ण क्षमतामा सञ्चालन गरिने प्रतिवद्धता व्यक्त गरे।
औषधिको मूल्य समायोजनका लागि सरकार काम गरिरहेको जानकारी दिँदै उनले राष्ट्रिय उत्पादनलाई प्रवर्द्धन गर्ने नीति अवलम्बन गरिने बताए। बिरामीहरूका लागि स्वास्थ्य बीमालाई प्रभावकारी बनाउने सरकारको नीति रहेको भन्दै उनले स्वास्थ्य सेवालाई व्यवस्थित, गुणस्तरीय र जनमुखी बनाउन कठोर निर्णयहरू लिनु आवश्यक रहेको धारणा राखे।
