काठमाडौं । आम जनता पार्टी (आजपा) का अध्यक्ष तथा पूर्वमन्त्री प्रभु साहले सुकुम्वासी बस्तीमा खानेपानीको व्यवस्था गर्न सरकारसंग माग गरेका छन् ।
प्रधानमन्त्री केपी शर्मा ओलीसंग उनले सुकुम्वासी बस्तीमा खानेपानीको लाईन किन काटेको भन्दै प्रश्न समेत गरे ।
काठमाडौंको अनामनगरमा आज आयोजित कार्यक्रमलाई सम्बोधन गर्दै आजपा अध्यक्ष साहले सरकारले सुकुम्बासी बस्तीमा खानेपानी नदिएर मानवता विरोधी अपाराध गरेको बताए । उनले सरकारले सुकुम्बासी बस्तीमा खानेपानी नदिएर नाकाबन्दी गरेको भन्दै सरकारको आलोचना गरे ।
‘सरकारले सुकुम्वासी बस्तीमा खानेपानीको व्यवस्था गरेको छैन् । उनीहरुलाई शुद्ध खानेपानी नदिएर सरकारले मानवता विरोधी अपराध गरेको छ । सुकुम्वासीसंग भोट लिने, कर लिने तर सेवा नदिने अहिलेको २१औँ शताब्दीमा खानेपानी नदिनु मानवता विरुद्धको अपराध हो’, आजपा अध्यक्ष साहले भने, ‘फोहोर पानीमा डुब्ने, तर स्वच्छ खानेपानी नपाउने सरकारले के गर्न खोजेको हो ? उनीहरुलाई खानेपानी नदिएर सरकारले नाकावन्दी नै गर्यो । उनीहरुको समस्या समाधान गर्न सरकारले चासो दिएन्, यो ठिक होईन्, हामी त्यतिकै छोड्दैनौं ।’
सरकारले यथासिघ्र सुकुम्वासी बस्तीमा खानेपानीको व्यवस्था गर्नुपर्ने बताउदै उनले सरकारले चासो नदिए कडा आन्दोलनमा उत्रिन बाध्य हुने चेतावनी दिए । ‘सुकुम्बासी बस्तीका समस्या समाधान गरी उनीहरुलाई व्यवस्थित रुपमा गाँस, बाँस र कपासको व्यवस्था सरकारले गर्न आवश्यक छ । सरकारले चासो दिएन भने हामी त्यसका बिरुद्ध आन्दोलन बाध्य हुनेछौं’ आजपा अध्यक्ष साहले भने ।
सरकारमा रहेका प्रधानमन्त्री, मन्त्री र केही सिमित नेताहरुले आफ्नो क्षेत्रको समस्या मात्रै समस्याको रुपमा बुझेको बताउदै उनले काठमाडौंको बिभिन्न ठाउँमा रहेका सुकुम्बासी बस्तीहरुको समस्या समाधान गर्नुपर्ने जोड दिए । नेताहरुले आफ्नो क्षेत्रमा लालपुर्जा बाँड्ने तर काठमाडौंको सुकुम्बासी समस्या समाधानमा चासो नदिएको उनले बताए । काठमाडौंका सुकुम्बासीहरुलाई लालपुर्जा दिएर यो समस्या समाधान गर्नुपर्ने उनले बताए ।
अहिलेको दलाल एवं लुटकारी दलतन्त्रका कारण सुकुम्बासीको समस्या समाधान हुन नसकेको बताउदै उनले दलाल दलतन्त्रको अन्त्य र सुकुम्बासी समस्याको समाधानका लागि तेस्रो जनआन्दोलनमा सहभागि हुन आग्रह गरेका छन् ।
दलाल एवं लुटकारी दलाल दलतन्त्रको अन्त्यका लागि तेस्रो जनआन्दोलनको घोषणा गरेका साह यतिवेला आन्दोलन सफल बनाउने रणनीतिका साथ भेटघाट एवं छलफलमा रहेका छन् । उनले गत वर्षको चैत्र २४ गते भृकुटीमण्डपबाट नै तेस्रो जनआन्दोलनको ऐलान गरेका थिए ।
सोहीअनुसार यही चैत्र २४ गते भृकुटीमण्डपमा आयोजना हुने तेस्रो जनआन्दोलन कार्यक्रमलाई सफल बनाउनको लागि उनी बिभिन्न कार्यक्रममा सहभागि हुदैआएका छन् ।
