हेटौँडा। बागमती प्रदेशका श्रम, रोजगार तथा यातायातमन्त्री प्रेमभक्त महर्जनले राजस्व भुक्तानी अब विद्युतीय माध्यमबाट हुने जानकारी दिए।
यातायात व्यवस्था कार्यालय हेटौँडाको निरीक्षण गर्दै उहाँले सेवाग्राहीलाई लाइनमा बस्ने झन्झट हटाउन कानुनी सुधार भइरहेको बताए। सवारी कर तथा बिलबुक नवीकरण मन्त्रालयको वेबसाइटमार्फत गर्न सकिने र सवारी चालक अनुमतिपत्र ‘नागरिक एप’मा देखिने व्यवस्था कार्यान्वयनमा रहेको मन्त्री महर्जनले जानकारी दिए।
ट्राफिक नियम उल्लङ्घनमा एपकै क्यूआर कोड स्क्यान गरी जरिवाना तिर्ने व्यवस्था गरिएको छ। आवेदन प्रक्रिया राष्ट्रिय परिचयपत्रसँग जोड्ने नयाँ प्रणालीको कार्यविधि अन्तिम चरणमा पुगेको छ। निरीक्षणका क्रममा मन्त्रीले कर्मचारी तथा सेवाग्राहीसँग अन्तरक्रिया गर्दै सेवा सुधारमा जोड दिए ।
