काठमाडौं। विभागीय टोलि नेपाल पुलिस क्लब विरुद्ध एकदिवसीय राष्ट्रिय प्रतियोगितामा ऐतिहासिक पहिलो जित दर्ता गर्दै कोशी प्रदेशले एमएम कप एकदिवसीय राष्ट्रिय प्रतियोगितामा विजयी सुरुवात गरेको छ।
बिराटनगरको बैजनाथपुर क्रिकेट मैदानआम सम्पन्न समुह ‘बि’ अन्तर्गतको पहिलो खेलमा कोशीले पुलिसलाई स्तब्ध पार्ने क्रममा ३७ रनको जित दर्ता गर्यो। मात्र ९४ रनको लक्ष्य पछ्याएको पुलिसले २४. ५ ओभरमा ५६ रनमा सबै विकेट गुमायो।
नेपाल पुलिस क्लबको ब्याटिंगमा कुनै पनि ब्याटरले दोहोरो अंकमा रन बनाउन सकेनन्। माथिल्लो क्रममा ब्याटिंग गरेका रोहन बिकले ६, अविनाश कर्णले ९, शंकर रानाले ५, दिपक डुम्रेले १, अमित श्रेष्ठले ९ तथा अरुण ऐरि खाता नखोली आउट भए। ३४ रनमा ६ विकेट गुमाएपछि कोशीले पुलिसलाई खेलमा फर्कन दिएन।
कोशीको बलिङ्गमा डेब्यु गरेका देब्रे हाते स्पिनर प्रेम कामत एक्लैले ५ विकेट लिए। ९ ओभर बलिङ्ग गर्दै ३ मेडन गरेर १५ रन मात्र खर्चिएका कामत प्लेयर अफ द म्याच घोषित भए। अर्का देब्रे हाते स्पिनर प्रकाश कार्कीले ३ विकेट लिए जुन क्रममा उनले ९ बोहरमा २ मेडन गर्दै १६ रन मात्र खर्चिए। भुपाल लुइँटेलले १ विकेट लिंदा पुलिसले एक विकेट रन आउट मार्फत गुमायो।
यस अघि टस हारेर ब्याटिंग गरेको कोशी प्रदेशले २९ . ३ ओभरमा ९३ रनमा सबै विकेट गुमायो। कोशीको ब्याटिंगमा ओपनर रुपक बरालले सर्वाधिक २१ रन बनाए। मिनाश थापा र सुमन गहतराजले समान १५ रन बनाए।
नेपाल पुलिस क्लबको बलिङ्गमा पेसर सुनिल दौल्यालले ५ विकेट लिए जुन क्रममा उनले ८ ओभरमा २५ रन खर्चिए। बिपिन खत्री र चित्र बिस्टले समान २ विकेट लिए।
प्रतियोगिता अन्तर्गत समुह ‘बि’ दोश्रो खेलमा भोलि बुधबार कोशी प्रदेशले भारतको आसाम क्रिकेट टिमसंग प्रतिस्पर्धा गर्नेछ। भोलि कोशीले आसामलाई पराजित गरे फाइनल प्रवेश गर्नेछ। आसामले कोशीलाई पराजित गरेको खण्डमा बिहिबार हुने आसाम र नेपाल पुलिस क्लब विरुद्धको खेलले फाइनल पुग्ने टिमको निर्धारण गर्नेछ। समुह ‘ए’ को विजेताको रुपमा त्रिभुवन आर्मी क्लब फाइनल प्रवेश गरिसकेको छ।
प्रतियोगितामा ६ टिम सहभागी छन् जसलाई दुई समुहमा बिभाजन गरिएको छ। समुह ‘ए’ मा शशस्त्र प्रहरी बल, त्रिभुवन आर्मी क्लब र बागमती प्रदेश छन्। समुह ‘बि’ मा नेपाल पुलिस क्लब, कोशी प्रदेश र भारतको आसाम क्रिकेट टिम रहेका छन्।
प्रतियोगिताको विजेता टोलीले रु. ४ लाख नगदसहित ट्रफी, प्रमाणपत्र र मेडल प्राप्त गर्नेछ । उपविजेता टोलीलाई रु. २ लाख नगदसहित ट्रफी, प्रमाणपत्र र मेडल दिइनेछ। त्यस्तै, प्रतियोगिताका उत्कृष्ट खेलाडीलाई रु. २५ हजार, उत्कृष्ट ब्याट्सम्यान र बलरलाई जनही रु. १५ हजार तथा प्रत्येक खेलको प्लेयर अफ द म्याचलाई रु. ४ हजार नगदसहित ट्रफी प्रदान गरिनेछ ।
