काठमाडौँ। ग्लोबल आईएमई बैंकले नेपाल क्लियरिङ हाउसको सहकार्यमा कार्डमा आधारित अनलाइन ग्लोबल पेमेन्ट गेटवे सुरू गरेको छ। यसमार्फत बैंकका मर्चेन्टहरूले भिसा र मास्टर कार्डबाट राष्ट्रिय तथा अन्तर्राष्ट्रिय भुक्तानी प्राप्त गर्न सक्नेछन्।
ई–कमर्स कारोबार प्रवर्द्धन गर्ने उद्देश्यले सुरू गरिएको यो गेटवेको माध्यमबाट मर्चेन्टहरूले देशविदेशबाट सहज रूपमा भुक्तानी लिन सक्नेछन्। ट्राभल एजेन्सी, होटल, एअरलाइन्स, अस्पताल जस्ता व्यवसायहरू लाभान्वित हुने अपेक्षा गरिएको छ।
थ्रीडी सेक्योर्ड प्रविधि प्रयोग गरिएकाले कारोबार थप सुरक्षित हुने बैंकको दाबी छ। ग्लोबल आईएमई बैंकलाई ग्लोबल फाइनान्सको ‘बेस्ट बैंक अवार्ड २०२४’ तथा ‘युरो मनी अर्वार्ड फर एक्सलेन्स २०२४’ प्राप्त भइसकेको छ।
सतहत्तरै जिल्लामा सेवा विस्तार गरेको बैंकका ३५४ शाखा, ३८४ एटीएम, २५५ शाखारहित बैंकिङ सेवा, ६८ एक्सटेन्सन काउन्टर र ३ वटा वैदेशिक कार्यालयसहित १,१०० भन्दा बढी सेवा केन्द्र छन्।
बैंकले अमेरिका, बेलायत, क्यानडा, अस्ट्रेलिया, मलेसिया, कोरिया, जापान, साउदी, कतार, युएई, बहराइन, कुवेत, भारतलगायत देशबाट रेमिट्यान्स सेवा दिँदै आएको छ।
