काठमाडौं। पन्जाब किङ्सले मुम्बई इन्डियनलाई ७ विकेटले पराजित गर्दै इन्डियन प्रिमियर लिग (आईपिएल) को पहिलो क्वालिफायरमा स्थान बनाएको छ।
१८५ रनको लक्ष्य पछ्याएको पन्जाबले ९ बल बाँकी छँदै ३ विकेटको क्षतिमा १८७ रन बनाउँदै रोमाञ्चक जित हात पारेको हो। पन्जाबको जितमा प्रियांश आर्य र जोस इङ्लिसको दोस्रो विकेटका लागि भएको १०९ रनको साझेदारी निर्णायक रह्यो। जोस इङ्लिसले ४२ बलमा ७३ रन र आर्यले ३५ बलमा ६२ रन बनाए। दुवै खेलाडीलाई माइकल सान्टनरले आउट गरे।
मुम्बईका लागि जसप्रित बुमराहले २३ रन खर्चेर एक विकेट लिए। त्यसअघि पहिले ब्याटिङ गरेको मुम्बईले ७ विकेट गुमाउँदै १८४ रन बनाएको थियो। सूर्यकुमार यादवले सर्वाधिक ५७ रन बनाए। हार्दिक पाण्डेले १५ बलमा २६ र नमन धिरले १२ बलमा २० रन जोडे।
पन्जाबको जितसँगै मुम्बई इलिमिनेटरमा पुग्ने पक्का भएको छ। अब लिग चरणको अन्तिम खेल लखनउ सुपर जायन्ट्स र रोयल च्यालेन्जर्स बंगलोरबीच हुनेछ। सो खेलमा बंगलोर विजयी भएमा उनीहरू क्वालिफायरमा पुग्नेछन् भने लखनउ विजयी भएमा गुजरात टाइटन्स पहिलो क्वालिफायरमा प्रवेश गर्नेछ।
