भक्तपुर। चाँगुनारायण नगरपालिका–१ सरस्वतीखेल बसपार्कस्थित १९ रोपनी १० आना सार्वजनिक जग्गा फिर्ता ल्याएर काल भैरबको मूर्ति स्थापना गरिएको छ।
२०४२ सालमा व्यक्तिको नाममा दर्ता भई हक हस्तान्तरण भएको उक्त ४७ नं कित्ता सार्वजनिक जग्गा फिर्ता ल्याउन स्थानीयले अख्तियारमा उजुरी दिएका थिए। अनुसन्धानपश्चात् २०६०/०६१ मा मालपोत कार्यालयमार्फत सरकारी नाममा दर्ता फिर्ता गरियो।
स्थानीय सरकार र बासिन्दाको पहलमा अहिले सो जग्गामा ढुङ्गाबाट काल भैरबको मूर्ति स्थापना गरी प्राण प्रतिष्ठा गरिएको छ। वडाध्यक्ष सिजन कार्कीका अनुसार अब उक्त क्षेत्रमा करिब २० लाख लागतमा अर्को मन्दिर, बहुउदेश्यीय सामुदायिक भवन निर्माण र धार्मिक पर्यटकीय गन्तव्यको विकास गर्ने योजना अघि बढाइएको छ।
