काठमाडौं। पतञ्जलिको जग्गा बिक्री प्रकरणमा अख्तियारले भ्रष्टाचार मुद्दा दायर गरेपछि नेकपा (एकीकृत समाजवादी) अध्यक्ष माधवकुमार नेपालले आफूविरुद्ध षड्यन्त्र भएको प्रतिक्रिया दिएका छन्।
पूर्वप्रधानमन्त्री नेपालले प्रधानमन्त्री केपी शर्मा ओलीको निर्देशनमा मुद्दा दर्ता भएको दाबी गर्दै भने, “उहाँ सुरुदेखि नै मेरो राजनीतिक करियर समाप्त पार्न चाहनुहुन्थ्यो।” उनले आफूले कुनै पनि भ्रष्टाचार नगरेको र त्यसका लागि आदेश नदिएको स्पष्ट पारे।
नेपाल समाजवादीका उपाध्यक्ष राजेन्द्र पाण्डेले पनि मुद्दा ओलीकै निर्देशनमा आएको आरोप लगाएका छन्। अख्तियारको मुद्दापछि नेपालको सांसद पद स्वतः निलम्बनमा पर्नेछ। नेपालले कानुनी प्रक्रियाको सामना गर्ने बताएका छन्।
