काठमाडौँ। सामाखुसी करिडोरअन्तर्गतको ढल निर्माणको ठेक्का प्रक्रियामा अनियमितता भएको आरोपमा अख्तियार दुरुपयोग अनुसन्धान आयोगले काठमाडौँ महानगरपालिकाका तत्कालीन प्रमुख प्रशासकीय अधिकृत प्रदीप परियारसहित सात जनाविरुद्ध विशेष अदालतमा भ्रष्टाचार मुद्दा दायर गरेको छ।
परियार हाल सूचना तथा प्रसारण विभागका महानिर्देशक हुन्। अख्तियारका अनुसार बोलपत्र मूल्यांकन समितिमा रहेका रवीनमान श्रेष्ठ, शिवराज अधिकारी, बसन्त आचार्य, नमराज ढकाल, जनार्दन गिरी र उत्तम दाहालसमेत संलग्न रहेको आरोप छ।
१८ करोडको सस्तो प्रस्ताव उपेक्षा गर्दै २२ करोडभन्दा बढीको उच्च कबोल गर्ने कल्पवृक्ष–कोहिनूर जेभीलाई ठेक्का दिइएको आरोप छ। यसबाट ४ करोड ३१ लाख रुपैयाँभन्दा बढीको आर्थिक दुरुपयोग भएको ठहर गर्दै मुद्दा दायर गरिएको हो।
अख्तियारले उजुरीका आधारमा अनुसन्धान अघि बढाएर प्रमाण जुटाएपछि बुधबार विशेष अदालतमा मुद्दा दायर गरेको जनाएको छ
