काठमाडौं। त्रिकोणात्मक टी–२० अन्तर्राष्ट्रिय श्रृंखलाको अन्तिम खेलमा स्कटल्याण्डले नेपाललाई १९४ रनको लक्ष्य दिएको छ। टस जितेर पहिले ब्याटिङ गरेको स्कटल्याण्डले २० ओभरमा ५ विकेट गुमाएर १ सय ९३ रन बनायो।
ओपनर जर्ज मुन्सेले आक्रामक ब्याटिङ गर्दै ३९ बलमा ७८ रन बनाए। उनले ६ छक्का र ५ चौका प्रहार गरे। ब्र्याण्डन म्याक्मुलेनले ४२, माइकल लिस्कले २६ र म्याथ्यू क्रसले अविजित १७ रन जोडे।
नेपालका लागि कुशल भुर्तेलले ३ विकेट, सन्दीप लामिछाने, रुपेश सिंह र ललित राजवंशीले १/१ विकेट लिए। नेपाल जारी श्रृंखलामा लगातार तेस्रो जितको खोजीमा छ।
यस्तै, स्कटल्याण्ड २ अंकका साथ तेस्रो स्थानमा छ । नेपाल र स्कटल्याण्डबीच अहिलेसम्म एक मात्र टी–२० आई खेल भएको छ, जसमा नेपाल विजयी भएको थियो । नेपाल आज पनि विजयी यात्रालाई निरन्तरता दिन चाहन्छ ।
