जुम्ला। स्याउ बिमाको रकम भुक्तानी नपाएको भन्दै जुम्लाका किसानहरु सडकमा उत्रिएका छन्। उनीहरूले तत्काल विगत वर्षको बिमा रकम दिनु पर्ने र यस वर्षको स्याउसमेत बिमा गर्नुपर्ने माग गरेका छन्।
किसानहरू जिल्ला प्रशासन कार्यालयमार्फत प्रधानमन्त्री कार्यालयमा ज्ञापनपत्र बुझाउँदै बालमन्दिरदेखि प्रशासन कार्यालयसम्म नाराबाजीसहित जुलुस निकाले।
स्याउ बिमा पहल समिति संयोजक खड्कबहादुर सेजुवालले पटक–पटक माग गर्दा पनि बिमा कम्पनीले आलटाल गर्दै आएको आरोप लगाउँदै आन्दोलन सुरु गरिएको बताए।
गत वर्ष खडेरी र असिनाका कारण स्याउमा क्षति पुगेको थियो। किसानले बिमा रकम नपाउँदा निराश भएको जनाउँदै, अब एक हप्ताभित्र समाधान नआए शिखर इन्स्योरेन्सको कार्यालयमा ताला लगाउने चेतावनी दिएका छन्। किसानहरूले बिमा मात्र नभई कृषि सरोकारवाला निकायहरूको निगरानी गर्न सञ्जालसमेत गठन गरेका छन्।
