काठमाडौँ। मलेसियामा जारी एसीसी पुरुष यू–१६ इस्ट जोन क्रिकेट प्रतियोगितामा नेपालले लगातार दोस्रो उत्कृष्ट प्रदर्शन गर्दै जापानलाई ८० रनमै समेटेको छ।
मलेसियाको कोजल टुन्कु जाफर ओभलमा जारी खेलमा नेपालका बायाँहाते स्पिनर शुभम खनालको घातक बलिङका कारण जापानी टोली ३४.३ ओभरमै अलआउट हुन बाध्य भयो। शुभमले ५ विकेट लिएर आफ्नो टोलीलाई बलियो स्थितिमा पुर्याए।
नेपालले टस गुमाएर फिल्डिङमा आएको खेलमा जापानले सुरुवातदेखि नै दबाब सामना गर्नुपर्यो। टस जितेर पहिला ब्याटिङ गरेको जापानका ब्याटरहरू नेपाली बलरहरूका अगाडि टिक्न सकेनन्। कप्तान चार्ली हाराहिन्जले सर्वाधिक ३६ रन बनाउँदै केही प्रतिरोध गरे भने गबी हाराहिन्जले १३ रनको योगदान दिए। अन्य कुनै पनि ब्याटरले दोहोरो अंक छुन सकेनन्।
नेपालका लागि शुभम खनालले ८ ओभरमा २ मेडन सहित १६ रन खर्चेर ५ विकेट लिएका थिए। अभय यादवले २ विकेट लिए भने सुशील रावल र विपिनप्रसाद शर्माले समान १–१ विकेट लिए। बलिङ विभागको उत्कृष्ट प्रदर्शनले नेपाललाई सानो लक्ष्यमा सिमित गर्ने अवसर जुरायो।
जवाफमा नेपालले सानदार सुरुवात गरेको छ। समाचार तयार पार्दासम्म नेपालले ७ ओभरमा एक विकेटको क्षतिमा ४७ रन बनाएको छ। ओपनरहरूद्वारा मजबुत शुरुवात दिलाइएको नेपाल अब सहज जितको दिशातर्फ अग्रसर देखिन्छ।
यसअघि प्रतियोगिताको पहिलो खेलमा नेपालले सिङ्गापुरलाई ६ विकेटले पराजित गर्दै सुखद सुरुवात गरेको थियो। सिङ्गापुरले दिएको ८१ रनको लक्ष्य नेपालले १७.५ ओभरमै पुरा गरेको थियो।
यो प्रतियोगिता एसीसी (एसियन क्रिकेट काउन्सिल) अन्तर्गत आयोजना गरिएको हो, जसमा इस्ट जोनका यू–१६ टोलीहरूको प्रतिस्पर्धा भइरहेको छ।
