जुम्ला। “देश निर्माण गर्न थुप्रै सपुतहरूको बलिदान आवश्यक पर्छ,” भन्ने भुपी शेरचनको भनाइले जस्तै, जनयुद्धका सहिदहरूको सपना र योगदानलाई मूर्त रूप दिन जुम्लामा ‘नमुना सहिद पार्क’ निर्माणको प्रक्रिया अगाडि बढाइएको छ।
गुठीचौर गाउँपालिका–५ मा निर्माण गरिँदै गरेको यो पार्क दुई सयभन्दा बढी सहिदहरूको सम्झनामा बनाइँदैछ, जसको नेतृत्व र पहल प्रतिनिधिसभा सदस्य छिरिङ लामाले गरेकी हुन्। लामाले यो परियोजनाका लागि १ करोड रुपैयाँ बजेट विनियोजन गराउन सफल भएकी छन्।
सांसद छिरिङ लामा सांसद निर्वाचित भएपछि जुम्लामा रहेका सहिद परिवारहरूसँग संवादमा जुटिन्। ती परिवारका पीडा, अपेक्षा र आशाहरूले उनलाई भावनात्मक रूपमा छोयो। यही भावनात्मक सम्बन्धलाई उनले योजनामा रूपान्तरण गर्दै सहिदहरूको सपना साकार पार्ने दिशामा ठोस कदम चाल्ने निधो गरिन्।
पहिलो प्रयासका क्रममा उनले चन्दननाथ नगरपालिकामा सहिद पार्क बनाउन १ करोड बजेटको व्यवस्था गरिन्। तर प्राविधिक कारण, विशेषगरी जमिन अभावका कारण उक्त योजना अगाडि बढ्न सकेन।
तर लामा त्यसपछि पछि हटिनन्। उनले जिल्ला नेताहरूसँग निरन्तर समन्वय गरिन्, विशेषगरी माओवादी केन्द्रका जिल्ला इञ्चार्ज नरेश भण्डारीसँगको परामर्शपछि गुठीचौरलाई वैकल्पिक स्थलको रूपमा चयन गरियो।
गुठीचौर गाउँपालिका–५ मा निर्माण हुन लागेको यो ‘नमुना सहिद पार्क’ भौतिक पूर्वाधार, सहज पहुँच र शान्त वातावरणका कारण आदर्श स्थानका रूपमा चिनिएको छ। यो स्थान सहिदहरूको स्मृतिमा मात्र सीमित नरही सामाजिक न्याय, शान्ति र परिवर्तनका लागि गरिएको संघर्षको प्रेरणा स्रोतको रूपमा स्थापित गरिने लक्ष्य छ।
सांसद लामाले भनिन्, “यो केवल स्मृति बनाउने परियोजना होइन, सहिदहरूको बलिदानलाई सम्मान गर्ने, नयाँ पुस्तालाई प्रेरणा दिने परियोजना हो।”
