काठमाडौं। आसन्न उपनिर्वाचनलाई लक्षित गर्दै निर्वाचन आयोगले मतदाता नामावली अद्यावधिकको अन्तिम मौका दिएको छ।
आयोगले निर्वाचन मिति घोषणाअघि नै नाम दर्ता गर्न छुटेकालाई समयमै पहल गर्न अनुरोध गरेको हो।
२०७९ को आम निर्वाचनपछि रिक्त भएका संघीय र प्रदेश तहका केही पदहरूका लागि आयोगले उपनिर्वाचन गर्ने तयारी गरिरहेको छ।
आयोगका सहायक प्रवक्ता दुर्गाप्रसाद चालिसेले मतदाता नामावली ऐन अनुसार निर्वाचन मिति घोषणा भएपछिको दर्ता प्रक्रिया रोकिने प्रावधान सम्झाउँदै, नाम छुटेका योग्य नागरिकलाई तत्कालै दर्ता गराउन आग्रह गरेका छन्।
यसअघि आयोगले कात्तिक दोस्रो सातामा उपनिर्वाचन गर्ने विषयमा तत्कालीन प्रधानमन्त्री केपी ओलीसँग छलफल गरिसकेको थियो। हाल रुपन्देही–३ का प्रतिनिधिसभा सदस्य र गण्डकी प्रदेशका मनाङ–१ (२) क्षेत्रको सिट रिक्त रहेको छ।
