काठमाडौं । विदेशमा काम गर्ने नेपालीहरूको विवरण सङ्कलन, व्यवस्थापन र सुरक्षाका लागि दुई फरक मोबाइल एप सञ्चालनमा ल्याइएको छ ।
‘श्रम संसार एप’ र ‘हामी मोबाइल एप’ नामक एपहरू हिजो छुट्टाछुट्टै कार्यक्रममार्फत सार्वजनिक गरिएका हुन् । ‘श्रम संसार एप’ परराष्ट्र मन्त्रालयबाट सञ्चालनमा ल्याइएको हो । परराष्ट्रमन्त्री डा. आरजु राणा देउवा र श्रम, रोजगार तथा सामाजिक सुरक्षा मन्त्री शरतसिंह भण्डारीले एपको संयुक्त रूपमा शुभारम्भ गर्नुभयो । यस एपमार्फत विदेशमा रहेका नेपालीले आफ्नो विवरण दर्ता गर्न सक्छन् ।
यसले कुन देशमा कति नेपाली छन् र उनीहरूको अवस्था कस्तो छ भन्ने जानकारी प्राप्त गर्न मद्दत गर्नेछ । यस्तो विवरणले विदेशमा रहेका नेपालीलाई आवश्यक कन्सुलर सेवा दिन, समस्या परेमा तुरुन्तै उद्धार र समन्वय गर्न सरकारलाई सहज बनाउनेछ ।
परराष्ट्र मन्त्री राणाका अनुसार, सूचना नहुँदा गएका वर्षहरुमा धेरै नेपाली ठगिएका, समस्यामा परेका र गुनासा मन्त्रालयमा आउने गरेका थिए । अब एपको प्रयोगले यस्ता समस्या हट्न सहयोग पुग्नेछ । यस्तै कोरिया सरकारले वैदेशिक रोजगारीमा जान चाहने नेपालीहरूलाई आवश्यक सूचना सजिलै दिन ‘हामी मोबाइल एप’ सञ्चालनमा ल्याएको छ । यो एप कोरिया सरकारको आर्थिक सहयोगमा तयार पारिएको हो ।
नेपाल सरकारको श्रम मन्त्रालयसँगको सहकार्यमा यो एप सञ्चालन हुनेछ । श्रममन्त्री शरतसिंह भण्डारीले एप सार्वजनिक गर्दै सरकारले श्रम बजारमा डिजिटल प्रविधिको प्रयोगबाट पारदर्शिता र नीतिगत सुधार गर्न चाहेको बताउनुभयो । ‘हामी मोबाइल एप’ नेपाली र अङ्ग्रेजी दुवै भाषामा प्रयोग गर्न सकिनेछ । एपमा सीप विकास, वित्तीय योजना, मानसिक स्वास्थ्यसम्बन्धी जानकारी तथा स्रोतहरू राखिएको छ ।
कोरियन दूतावासका अनुसार, कोरियामा रोजगारका लागि जानुअघि, त्यहाँ कार्यरत रहँदा र फर्किएपछि समेत यो एपले नेपाली श्रमिकलाई सहयोग पुर्याउनेछ । साथै, उद्यमशीलता प्रवर्द्धन र वैदेशिक रोजगारलाई मर्यादित, सुरक्षित र व्यवस्थित बनाउने उद्देश्य राखिएको छ ।
