काठमाडौं। एसीसी यू–१६ इस्ट जोन क्रिकेट प्रतियोगितामा नेपालले आइतबार इन्डोनेशियालाई पराजित गर्दै लगातार तेस्रो जित हात पारेको छ। नेपालले प्रस्तुत गरेको ४२१ रनको विशाल लक्ष्य पछ्याउने क्रममा इन्डोनेशियाको टोली जम्मा ५० रनमै समेटियो।
नेपालले २४ ओभर ३ बलमै विपक्षीलाई अलआउट गर्दै ३७० रनको फराकिलो जित दर्ता गर्यो। नेपालका बलर विपिन शर्माले उत्कृष्ट प्रदर्शन गर्दै ७.३ ओभरमा मात्र १२ रन खर्चिएर ६ विकेट लिए। बलिङतर्फ उनी नै खेलको सुपरस्टार बने।
यसअघि, टस जितेर पहिले ब्याटिङ गरेको नेपालका लागि प्रसिद्ध जैशीले १३२ रनको शान्दार शतक प्रहार गरे। त्यसैगरी परिमार्जन यादवले ७१ रन, रौनक श्रीवास्तवले ८८ रन र जोय थापाले ५७ रनको योगदान दिए। नेपालले निर्धारित ओभरमा ४२१ रन बनाएको थियो।
यस जितसँगै नेपाल यू–१६ टोलीको प्रदर्शन प्रतियोगितामा अझ बलियो बनेको छ।
