सुर्खेत। कर्णाली प्रदेशका मुख्यमन्त्री यामलाल कँडेलले प्रदेशको आर्थिक समृद्धिको आधार कृषि भएकाले परम्परागत खेती प्रणाली त्यागी आधुनिक र व्यावसायिक कृषि प्रणालीमा रूपान्तरण गर्न आग्रह गरेका छन्।
अखिल नेपाल महिला संघद्वारा आइतबार सुर्खेतमा आयोजित राष्ट्रिय धान दिवस कार्यक्रममा किसानहरूसँगै रोपाइँमा सहभागी भएका मुख्यमन्त्री कँडेलले अब कृषि गुजारा चलाउने माध्यम मात्र नभई आम्दानी र रोजगारीको भरपर्दो स्रोत बन्नुपर्ने बताएका छन्।
उनले भने, “कर्णालीको माटोमा सुन फलाउन सकिन्छ, तर त्यसका लागि सोच र कर्मशैलीमा परिवर्तन ल्याउनु आवश्यक छ। खेतीपातीलाई व्यवसायिक ढंगले अघि बढाउन सरकार र किसानले हातेमालो गर्नुपर्छ।”
मुख्यमन्त्री कँडेलका अनुसार कर्णालीको भौगोलिक विविधता विशेष प्रकारका बालीनाली उत्पादनका लागि उपयुक्त भएकाले वैज्ञानिक ढंगले व्यवस्थापन गर्न सके कृषि क्षेत्रले कर्णालीको मुहार फेर्न सक्छ।
प्रदेश सरकारले कृषक दर्ता, सहुलियतपूर्ण ऋण, गुणस्तरीय बीउबिजन, मलखादको सहज आपूर्ति र सिँचाइ पूर्वाधारमा लगानी बढाउँदै आएको जानकारी पनि उनले कार्यक्रममा दिए।
