सुर्खेत। महिलाको अश्लिल भिडियो बनाएर बिक्री गरेको आरोपमा सुर्खेतका एक युवक पक्राउ परेका छन्। पक्राउ पर्ने व्यक्ति वीरेन्द्रनगर नगरपालिका–६ का २९ वर्षीय रमेश थापा हुन्। उनलाई प्रहरीले काठमाडौँको टोखाबाट पक्राउ गरेको हो।
जिल्ला प्रहरी परिसर काठमाडौँका प्रवक्ता एसपी अपील राज बोहराका अनुसार थापाले नेपाल र विदेशमा रहेका महिला तथा पुरुषलाई आर्थिक प्रलोभन देखाएर भिडियो कलमार्फत अश्लिल गतिविधिमा सहभागी गराउँदै आएका थिए। सो क्रममा उनले ती अश्लिल क्रियाकलापहरू रेकर्ड गरी बिक्रीसमेत गर्ने गरेको प्रहरीले जनाएको छ।
प्रहरीले मुलुकी फौजदारी अपराध संहिता, २०७४ को दफा १२१ अनुसार अश्लिल सामग्री निर्माण तथा वितरण गरेको अभियोगमा थापाविरुद्ध पाँच दिनको म्याद लिएर अनुसन्धान अघि बढाएको छ।
