सुर्खेत। कर्णाली प्रदेशको भौतिक पूर्वाधार विकास मन्त्रालयमा कार्यरत सवारी चालक हिमबहादुर विष्टको शव करिब दुई हप्ता बेपत्ता भएको अवस्थामा भेरी नदी किनारमा फेला परेको छ ।
अन्दाजी २९ वर्षीय विष्ट गत असार ५ गते यता सम्पर्कविहीन थिए । सुर्खेत जिल्लाको बराहाताल गाउँपालिका–४ साजघाटस्थित भेरी नदी किनारमा शुक्रबार उनको शव फेला परेको जिल्ला प्रहरी कार्यालय सुर्खेतका प्रहरी नायव उपरीक्षक (डीएसपी) मोहनजंग बुढथापाले जानकारी दिए ।
दैलेखको चामुण्डा–बिन्द्रासैनी नगरपालिका–२ घर भएका विष्टले असार ६ गते बिहान “बिरामी छु” भन्दै कार्यालयमा खबर गरेका थिए । त्यसपछि उनी सम्पर्कविहीन भएका थिए ।
बेपत्ताको खोजीका क्रममा असार ९ गते भेरीगंगा नगरपालिका नजिकैको भेरी पुलको छेउमा विष्टले प्रयोग गर्ने सरकारी मोटरसाइकल बेवारिसे अवस्थामा भेटिएको थियो ।
यसपछि प्रहरीले खोजी तीव्र बनाएको थियो र अन्ततः शुक्रबार भेरी नदीको किनारमा उनको शव फेला परेको हो । हाल घटनाबारे थप अनुसन्धान भइरहेको प्रहरीले जनाएको छ ।
