सुर्खेत। सुर्खेत जिल्लाको भेरीगंगा नगरपालिका–८ कुईरेमा चट्याङ लाग्दा एक जनाको मृत्यु भएको छ भने चार जना घाइते भएका छन् ।
शुक्रबार दिउँसो करिब ३ बजे रोपाइँको क्रममा चट्याङ पर्दा डिलबहादुर शाही गम्भीर घाइते भएका थिए । उनलाई उपचारका लागि मेहलकुना अस्पताल लगिएको भए पनि ज्यान जोगाउन सकिएन । जिल्ला प्रहरी कार्यालय सुर्खेतले उनको मृत्यु पुष्टि गरेको छ ।
उक्त घटनामा पर्वत विक, हुमबहादुर थापा, नविन विक र सुनिता गिरी घाइते भएका छन् । हाल उनीहरूको मेहलकुना अस्पतालमै उपचार भइरहेको प्रहरीले जानकारी दिएको छ ।
सुरक्षाकर्मी र स्थानीय प्रशासनले चट्याङजस्ता प्राकृतिक विपत्तिप्रति सचेत रहन र आवश्यक सतर्कता अपनाउन सर्वसाधारणलाई आग्रह गरेका छन् ।
