काठमाडौं। बंगलादेशमा जारी साफ महिला यू-२० च्याम्पियनसिप फुटबल प्रतियोगितामा नेपालले भव्य जितसँगै प्रतियोगिताको उत्कृष्ट सुरुआत गरेको छ।
शुक्रबार सम्पन्न पहिलो खेलमा नेपालले भुटानलाई ६–१ को फराकिलो अन्तरले पराजित गर्दै तीन अंक हात पारेको हो।
नेपालको जितमा पूर्णिमा राईले चार गोल गर्दै चम्किएकी हुन्। उनले खेलको १८औं, ५३औं, ८३औं र ८८औं मिनेटमा गोल गर्दै ह्याट्रिक मात्र होइन, ‘क्वाड्रुपल’ नै पूरा गरिन्। त्यस्तै, सोनु परियारले थप दुई गोल गर्दै टोलीको जित सुनिश्चित गरिन्।
भुटानका लागि केल्देन वाङ्मोले एक मात्र सान्त्वना गोल गरेकी थिइन्। चार देश सहभागी प्रतियोगिता डबल राउन्ड रोबिन फारम्याटमा हुँदैछ। नेपालले आफ्नो दोस्रो खेल आइतबार बंगलादेशविरुद्ध खेल्ने कार्यक्रम छ।
