काठमाडौं। कथाकार गुरुप्रसाद मैनालीको चर्चित कथा ‘परालको आगो’ मा आधारित नयाँ फिल्मको औपचारिक वर्कसप आइतबारदेखि सुरु भएको छ ।
निर्माण टिमले सिनेमालाई अझ प्रभावकारी बनाउन कलाकारहरूलाई एउटै स्थानमा भेला गरी अभ्यास सुरु गरेको हो । वर्कसपमा सौगात मल्ल, प्रकाश सपुत, सुहाना थापा, सिर्जना अधिकारी, शंकर आचार्य, किशोर भण्डारी, कुलदीप अधिकारी, सरु भण्डारी र रेणु न्यौपानेलगायत कलाकार सहभागी छन् । उनीहरूले आफ्ना भूमिकालाई अझ सशक्त बनाउन विभिन्न अभ्यासमा संलग्न छन् ।
निर्माता सुशील पोखरेल र लेखक सुशील देवकोटा पनि वर्कसपमा सक्रिय सहभागी छन् । निर्माता पोखरेलले सिनेमाको गुणस्तरमा कुनै सम्झौता नगर्ने प्रतिबद्धता व्यक्त गरेका छन् । फिल्मको निर्देशन लक्ष्मण सुनारले गरिरहेका छन् ।
गीत–संगीतको जिम्मेवारीमा सुरेन्द्र राना, मनबहादुर मुखिया र प्रकाश सपुतका शब्दमा शान्ति ठटाल, सत्य स्वरूप र प्रकाश सपुतले संगीत दिनेछन् । वरिष्ठ संगीतकार शान्ति ठटालसँग दुई महिनाअघि नै उहाँकै निवासमा पुगेर संगीत प्रयोगको स्वीकृति लिइएको निर्माण टिमले जनाएको छ ।
आगामी भदौ २६ गतेदेखि म्याग्दीका सुन्दर स्थानहरूमा फिल्मको छायांकन सुरु हुने भएको छ । सिनेमाटोग्राफी संकल्प भुजेलले गर्नेछन् भने प्राविधिक टोलीमा रामजी लामिछाने (नृत्य निर्देशन), सुलक्षण भारती (स्क्रिप्ट डक्टरिङ), सुशील देवकोटा (पटकथा) र नगेन्द्र घिमिरे (प्रोडक्सन म्यानेजर) रहेका छन् ।
स्मरणीय छ, मैनालीको ‘नासो’ कथा संग्रहमा समावेश ‘परालको आगो’ करिब ४५ वर्षअघि निर्देशक प्रताप सुब्बाले पर्दामा उतारेका थिए, जसले व्यावसायिक सफलता पाएको थियो ।
