काठमाडौँ। अष्ट्रेलियाका ब्याट्सम्यान तथा इन्डियन प्रिमियर लिग (आईपिएल) का अनुभवी खेलाडी क्रिस लिनले नेपाल प्रिमियर लिग (एनपीएल) को दोस्रो संस्करण खेल्ने भएका छन् ।
उनले सुदूरपश्चिम रोयल्सबाट खेल्नेछन् । यद्यपि, आधिकारिक घोषणा भने भइसकेको छैन । सुदूरपश्चिमले बुधबार सामाजिक सञ्जालमा अष्ट्रेलियाका खेलाडी भित्राएको उल्लेख गर्दै खेलाडीको नाम भने तोकेको छैन ।
खेलाडीको बारेमा दिएको हिन्टको आधार मान्दा उक्त खेलाडी अष्ट्रेलियाका क्रिस लिन भनेर बुझन सकिन्छ । उक्त पोस्टमा २२० छक्का र ३९५५ रन पनि उल्लेख गरिएको छ । जसको आधारमा पनि क्रिस हुन् भनेर आँकलन गर्न सकिन्छ । उनले अष्ट्रेलियन लिग बिग ब्यास (बिबिएल) लिगमा गरेको प्रदर्शन उक्त कुरासँग मेल खान्छ ।
उनले लिगका १२७ खेलमा ३९५५ रन बनाएका छन् । जसमा २२० छक्का प्रहार गरेका छन् । सन् २०१४ देखि २०१८ सम्म अष्ट्रेलियाका लागि खेलेका लिनले १८ खेलको १६ इनिङमा २९१ रन बनाएका छन् ।
उनले बिबिएलसहित इन्डियन प्रिमियर लिग, पाकिस्तान सुपर लिगसहितका विश्वका चर्चित लिग खेलिसकेका छन् ।
