काठमाडौं। दक्षिण एसियाली फुटबल महासंघ (साफ)ले पहिलोपटक फुटसल च्याम्पियनसिप आयोजना गर्ने भएको छ।

साफका महासचिव पुरुषोत्तम कट्टेलले आइतबार पुरुष र महिला दुवैका लागि फुटसल च्याम्पियनसिप आयोजना गर्ने जानकारी दिएका हुन्। प्रतियोगिता सन् २०२६ जनवरी १३ देखि २६ सम्म थाइल्यान्डमा हुनेछ।

कट्टेलले भने, “फिफाले आफ्ना सदस्य संघहरूलाई परम्परागत फुटबलसँगै फुटसल र बिच फुटबलमा पनि सक्रिय सहभागिता जनाउन प्रेरित गरिरहेको छ। तर, दक्षिण एसिया यी खेलहरूमा निकै पछाडि छ।”

यो प्रतियोगिता दक्षिण एसियामा फुटसलको प्रवर्द्धन र विस्तारतर्फको ऐतिहासिक कदम मानिएको छ।

उनले थपे, “हाम्रो क्षेत्रमा फुटसलमा संलग्न अधिकारीहरूको ठूलो अभाव पनि देखेका छौं। त्यसैले अब यस क्षेत्रमा फुटसल विकास सुरु गर्नु अत्यावश्यक छ। कार्यसमितिले यो निर्णय स्वीकृत गरिसकेको छ र यस ऐतिहासिक पहलका लागि हामी फिफा र एएफसी दुवैको सहयोगका लागि आभारी छौं।”