काठमाडौं। सेन्ट्रल एसिया भलिबल एशोसिएसन (काभा) महिला भलिबल च्याम्पियनसिपमा माल्दिभ्सले सान्त्वना जित हासिल गर्दै प्रतियोगिताको सुखद अन्त्य गरेको छ ।
त्रिपुरेश्वरस्थित राष्ट्रिय खेलकुद परिषद् राखेपको कभर्डहलमा बुधबार सातौं स्थानका लागि भएको खेलमा माल्दिभ्सले बंगलादेशलाई ३–१ को सेटमा पराजित गर्यो ।
पहिलो सेट २५–२७ ले गुमाएको माल्दिभ्सले त्यसपछि पुनरागमन गर्दै लगातार तीन सेट आफ्नो पक्षमा पार्यो । माल्दिभ्सले दोस्रो सेट २५–११, तेस्रो सेट २५–१७ र चौथो सेट २५–१२ ले जित्दै खेल आफ्नो पक्षमा पारेको हो ।
यस जितसँगै आठ टोली सहभागी प्रतियोगितामा माल्दिभ्स सातौं स्थानमा रहँदै प्रतियोगिताको अन्त्य गर्न सफल भयो । पराजित बंगलादेश भने आठौं स्थानमा सीमित रह्यो । प्रतियोगिताअन्तर्गत अब सेमिफाइनल चरणका खेल बिहीबार हुनेछन् ।
पहिलो सेमिफाइनलमा भारत र काजाकिस्तान दिउँसो २ः३० बजे प्रतिस्पर्धा गर्नेछन् भने दोस्रो सेमिफाइनलमा घरेलु टोली नेपालले साँझ ५ बजे इरानसँग प्रतिस्पर्धा गर्नेछ ।
