काठमाडौं। नेपाल समूह विजेता बन्दै एसियन गेम्स पुरुष क्रिकेट छनोटको सेमिफाइनलमा प्रवेश गरेको छ । प्रतियोगिताअन्तर्गत बिहीबार समूह ‘ए’को अन्तिम खेलमा नेपालले मलेसियाविरुद्ध १६७ रनको फराकिलो जित निकाल्यो ।
सिंगापुर नेसनल क्रिकेट ग्राउन्डमा नेपाले प्रस्तुत गरेको २७६ रनको लक्ष्य पछ्याएको मलेसियाले २० ओभरमा नौ विकेट गुमाउँदै १०८ रन मात्र बनाउन सक्यो ।
मलेसियाका कप्तान सयद अजिजले ५४ रन जोडे । उनले ४५ बलमा ६ चौका र दुई छक्का प्रहार गरे । शर्विन मुनियान्डीले १८ र मोहम्मद आइमनले १३ रन बनाए ।
नेपालका शेर मल्लले सर्वाधिक तीन विकेट लिए । करण केसी, सोमपाल कामी, सन्दीप लामिछाने, कुशल मल्ल र कप्तान दीपेन्द्रसिंह ऐरीले एक/एक विकेट लिए ।
त्यसअघि, टस हारेर ब्याटिङ गरेको नेपालले निर्धारित २० ओभरमा सात विकेट गुमाएर २७५ रन बनाएको थियो ।
नेपालका कुशल भुर्तेलले १२६ रनको उत्कृष्ट इनिङ खेले । ५४ बलको सामना गरेका उनले १४ चौका र आठ छक्का प्रहार गरे ।
ट्वान्टी–२० अन्तर्राष्ट्रियमा कुशलको यो लगातार दोस्रो तथा समग्रमा तेस्रो शतक हो । उनले यही प्रतियोगितामा चीनविरुद्ध पनि शतक प्रहार गरेका थिए । योसँगै उनी टी–२० अन्तर्राष्ट्रियमा लगातार दुई शतक बनाउने पहिलो नेपाली तथा समग्रमा १०औँ खेलाडी बनेका छन् ।
आसिफ शेखले ६८ रन बनाए । उनले २४ बलमा सात छक्का र पाँच चौका प्रहार गरे । दीपेन्द्रसिंह ऐरीले ३१, सन्दीप जोराले १५ र लोकेश बमले १० रन जोडे ।
कुशलले पहिलो विकेटका निम्ति आसिफ शेखसँग १३४ र तेस्रो विकेटका लागि दीपेन्द्रसँग ५१ रनको साझेदारी गरेका थिए ।
मलेसियाका वीरनदीप सिंहले तीन, विजय उन्नी र सयद अजिजले दुई/दुई विकेट लिए ।
जितसँगै नेपालले दुई खेलबाट चार अंक जोड्यो । पराजित मलेसिया पनि समान खेलबाट दुई अंकका साथ उपविजेताका रूपमा सेमिफाइनलमा प्रवेश गर्यो ।
नेपाल र मलेसियाले यसअघि नै एसियन गेम्समा स्थान पक्का गरिसकेका थिए । पहिलो खेलमा दुवै टोलीले चीनलाई हराएका थिए । नेपालले २२१ रनले पराजित गरेको थियो । मलेसिया नौ विकेटले विजयी भएको थियो ।
