४ असोज, काठमाडौँ। असोज १७ गते दशैंको घटस्थापनाबाट प्रदर्शनमा आउने चलचित्र ‘बेहुली फ्रम मेघौली’को ट्रेलर सार्वजनिक गरिएको छ ।

बिहीबार काठमाडौंमा आयोजित एक कार्यक्रमका बीच सार्वजनिक ३ मिनेट १७ सेकेण्ड लामो टिजरले सिनेमाको कथावस्तुबारेमा प्रकाश पारेको छ । ट्रेलर हेर्दा फिल्ममा विवाहको सामाजिक परम्परागत मान्यतालाई फिल्मले व्यङ्ग्य गरेको अनुमान गर्न सकिन्छ ।

३० वर्ष नकट्दै विवाह गर्नुपर्ने ज्योतिषको सुझावपछि अभिनेत्री स्वस्तिमा खड्कालाई परिवारबाट विवाहको दबाब बढ्छ। परिवारले खोजेका कुनै पनि केटा मन नपरेपनि फिल्मकी मुख्यपात्र स्वस्तिमाले निश्चल बस्नेतलाई मन पराएकी छन् तर उसको अरुसँग प्रेम बसेको छ। यो दबाबबीच योग्य वर पाउन परिवार र युवतीले कस्तो संघर्ष गर्नुपर्छ भन्ने चित्रण गरिएको छ। ट्रेलरमा संवादले दर्शकको मन जित्ने देखिन्छ।

फिल्ममा निश्चल र स्वस्तिमाका अलवा बसुन्धरा भुसाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको अभिनय रहेको छ।