काठमाडौं। लोकप्रिय गायिकाहरु एलिना चौहान र समीक्षा अधिकारीले सामाजिक सञ्जालमा आएका अश्लील र अपमानजनक कमेन्ट गर्ने प्रयोगकर्ताहरूको प्रोफाइल सार्वजनिक गर्न थालेका छन्।
आत्मसम्मानमा ठेस पुग्ने अभिव्यक्तिहरू सहन नसकेको बताउँदै उनीहरूले ती प्रयोगकर्ताहरूको कमेन्टसहितको विवरण सामाजिक सञ्जालमा राखेका हुन्। एलिना चौहानले कानुनी प्रक्रिया अघि बढाउने तयारीसमेत गरेकी छन्।
सामाजिक सञ्जालमै कतिपय प्रयोगकर्ताले माफी मागेका छन् भने केहीले गायिकाको कदमको समर्थन गरेका छन्। यद्यपि केहीले यस्तो कार्यलाई उचित नभएको टिप्पणी पनि गरेका छन्।
यसअघि अभिनेत्री ऋचा शर्मा र टिकटकर जोडी प्रिन्सी–प्रिज्मा खतिवडाले पनि अभद्र कमेन्ट सार्वजनिक गरेका थिए।
