काठमाडौँ। कात्तिक २१ गतेदेखि प्रदर्शनमा आउने फिल्म ‘मन बिनाको धन’ को नयाँ पोस्टर सार्वजनिक गरिएको छ। पोस्टरमा मुख्य अभिनेता तथा गायक अशोक दर्जीलाई केन्द्रमा राखिएको छ, जहाँ उनी ओठमा हाँसो र आँखामा आँसुका साथ देखिएका छन्। पोस्टरले अशोकको संघर्ष र सफलताको कथा संकेत गर्छ। टंक बुढाथोकी निर्देशित फिल्ममा सरोज खनाल, निता ढुङ्गाना, बुद्धि तामाङ, रमेश विश्वकर्मा, भोला सापकोटा र रवीन्द्र झा लगायत कलाकारको अभिनय छ। ‘कथा जिरोदेखि हिरोसम्म’ भन्ने ट्यागलाइनसहितको फिल्ममा सन्तोष पन्त, रमा थपलिया, पार्वती अधिकारीलगायत पनि देखिने छन्। फिल्मको कथा र संगीत निर्देशक बुढाथोकीकै हो भने पटकथा र संवाद शिवम् अधिकारीले लेखेका हुन्। फिल्ममा सौरभ लामाको छायांकन, कविराज गहतराज र रामजी लामिछानेको कोरियोग्राफी र मित्र डि. गुरुङको सम्पादन रहेको छ।