काठमाडौँ। नेपालले यू–१७ साफ च्याम्पियनसिपको सेमिफाइनलमा बलियो प्रतिद्वन्द्वी भारतसँग खेल्ने भएको छ।
भारतले सोमबार कोलम्बोको रेस कोर्स मैदानमा पाकिस्तानलाई ३–२ ले हराउँदै समूह ‘बी’ को विजेता बनेपछि यस्तो समीकरण बनेको हो। भारतका लागि रहान अहमदले निर्णायक गोल गरेका थिए।
नेपाल भने समूह ‘ए’ को उपविजेता हो। उसले पहिलो खेलमा श्रीलंकालाई २–० ले हराएको थियो तर दोस्रो खेलमा बंगलादेशसँग ४–० ले पराजित भएको थियो।
अब बिहीबार हुने सेमिफाइनलमा नेपालले भारतसँग भिड्नेछ। सोही दिन अर्को सेमिफाइनलमा समूह ‘ए’ को विजेता बंगलादेशले समूह ‘बी’ को उपविजेता पाकिस्तानसँग प्रतिस्पर्धा गर्नेछ।
